kumpulan koleksi pantun minang

Kali ini admin akan memberikan koleksi pantun minang yang didapatkan dari internet. langsung saja ini daftaranya :

Talatak saka jo daun batiak
Dek buah jirak nan takikih di ladang
taragak bana denai samo adiak
Dek jarak jauah jo pitih sayuik nan mahadang

kok bulek samo digolong
kok tipih samo dilayang
rancak pikek jan lah sombong
karano pitih ndak salamo nyo sanang

indak layang jan diganjuang
kok iyo layang cubolah naiekkan
indak sayang jan digantuang
kok iyo sayang cubolah liekkan

juluak jo galah buah kuini
buah tomaik di ateh lantai
dimanolah posisi adiak kini
tulihlah alamaik kiriman patai

Buruang palatuak hinggok didindiang
Sarang disariak ditembak patuih
Dipakuak bana jo mato ladiang
Sayang ka adiak indak ka putuih

bialah kanji bacampua luo
di makan urang di bawah talang
bialah kini hati den taibo
untuang kok isuak lai kasanang

payokumbuah basimpang ampek
sasimpang jalan ka limbanang
jalo lusuah ikan tak dapek
badan lah dingin dek baranang

dirantang bana tali nan panjang
dek takuik kusuik kini diputa
mande kini bamanuang surang
maranuang diri sambiah bado’a

Dimalah padi kamanjadi
tiok lalu dilendo anggang
coiko bana padiahnyo hati
dari muko lapeh kabalakang

pandai bana urang mamikek
mambuek hati manjadi harok
kok mato uda lah taraso barek
rancak lah di baok lalok

Rami urang ditangah balai,
Rami dek anak urang Tiku.
Bia kini kito bacarai,
Asalkan nanti kito batamu.

Taluak Bayua ikannyo jinak,
Bao mamapeh dari sampan.
Ayam sikua musang kok banyak,
Raso kalapeh dari tangan.

Rang Parik Putuih kalapau randah,
Mambao balam dalam sarangnyo.
Kasieh putuih sayang tak sudah,
Lauik nan dalam nan di hadangnyo.

Bukik tinggi jo padang panjang
Nan ka tigo pandai sikek
Kasiah abih sayang tak hilang
Antah jo apo hati kadi ubek

la masak padi rang tanjuang
indak barayie masak juo
bia 7 lampih di ambek gunuang
nan di hati nampak juo

badabua ombak di lauit puruih
mahampehnyo katapi pantai
baa badan ndak ka kuruih
dek ulah kasiah nan indak sampai

Kapa balayie kasubarang
Barangkeknyo dihari sanjo
Aie mato jatuah balinang
Takana adiak nanlah tiado

. pa’i kapasa mambali bakwan
bakwan di bali hari lah sanjo
bapisah denai nan jo kawan
dek ulah asungan urang katigo

Kain batiek tabang mangirok.
Unduang-unduang anak rang Bayang.
Tampak adiek darah tasirok,
Badan bak raso bayang-bayang.

Bia badarai padi sipuluik,
Jiko badarai mangko dikaka.
Bia bacarai kito dimuluik,
Asa dihati indak batuka.

Anak urang Tanjuang Andaleh,
pai kabalai hari sanjo.
Bia habih bialah tandeh,
Hati den kanai kaba-a juo.

Duduak bajuntai ateh balai.
Mamandang katangah labuah.
Isuak kasamo kito rasai,
Didalam aie badan bapaluah.

Kurai Taji Balai Sinayan
Urang tuo manggaleh lado,
Capek kaki ringan tangan,
Namun salero lapeh juo.

dek sero makan jo cancang
ndak sadar rumah kanai maliang
mangalah duduak di ateh pancang
beko sarupo jo ayam guliang

rang gadih ka tapi pantai
ka pantai mambasuah kaki
coitu bana lamaknyo patai
nasi dimakan nan jo baki

kumpulan koleksi pantun minang Rating: 4.5 Diposkan Oleh: mario dewantara

0 komentar:

Poskan Komentar